ლუი პასტერი - (სიცოცხლის წარმოშობის შესახებ თვითჩასახვის ჰიპოთეზა მცდარია)

გამოჩენილმა ფრანგმა მეცნიერმა ლუი პასტერმა 1862 წელს მახვილგონივრული ექსპერიმენტით დაამტკიცა, რომ შეუძლებელია მიკროორგანიზმების წარმოშობა თვითჩასახვის გზით, რითაც საბოლოოდ დაუსვა წერტილი ჰიპითეზას სიცოცხლის თვითჩასახვით წარმოშობის შესახებ. 

ლუი პასტერმა კოლბაში მოათავსა მიკრობების საკვები არე - ბულიონი. კოლბის ყელს S-ის ფორმის მინის მილი მიამაგრა და გაასტერილა. კოლბაში თავისუფლად შედიოდა ჰაერი, მაგრამ მიკრობები ვერ იჭრებოდა. გარემოსთან უშუალო კავშირის მიუხედავად კოლბის შიგთავსი თვეების განმავლობაში სტერილური რჩებოდა. 

აღნიშნული ექსპერიმენტით პასტერმა დაასაბუთა, რომ ორგანული ნაერთების შემცველ ბულიონში მიკროორგანიზმები თვითჩასახვით კი არ ჩნდებიან, არამედ გარემოდან ხვდებიან და ხელსაყრელ პირობებში მრავლდებიან.

ბიოლოგიის ოლიმპიადის I ტური

2024 წლის 18 აპრილს სსიპ - ქ. თბილისის N156 საჯარო სკოლაში ბიოლოგიის კლუბ - „გენეტიკური კოდის“ ინიციატივით მე-7 კლასის მოსწავლეებისათვის გაიმართა სასკოლო ოლიმპიადის I ტური ბიოლოგიაში. 

აქტივობის მიზანია:

•  გაზარდოს მოსწავლეებში ბიოლოგიის საგნისადმი ინტერესი და სწავლის მოტივაცია;
• შესძინოს მოსწავლეებს გამოცდებსა თუ საგნობრივ ოლიმპიადებზე აუცილებელი ბაზისური უნარ-ჩვევები;
• ხელი შეუწყოს სკოლაში ბიოლოგიის საგნის პოპულარიზაციას.

აღნიშნული ოლიმპიადა ჩატარდება 2 ეტაპად. I ტურში მოსწავლეებს 45 წუთის განმავლობაში 30 დახურული ტიპის დავალება უნდა შეესრულებინათ, ხოლო II ტურში დაგეგმილია ღია ტიპის დავალებების შესრულება. 

ოლიმპიადის I ტურში 27 მოსწავლე მონაწილეობდა, მათგან მაისის თვეში II ტურში მონაწილეობას განაგრძობს 12 მოსწავლე, რომელთაც დააგროვეს ქულათა 50%-ზე მეტი.  

მადლობას ვუხდი ჩვენი სკოლის და ამავე დროს, ბიოლოგიის კლუბის წევრ მე-10 კლასის მოსწავლეებს, რომელთაც უზრუნველყვეს ოლიმპიადის საორგანიზაციო საკითხების მოწესრიგება და ტესტირების მშვიდ, დადებით გარემოში ჩატარება.

I ტურის დავალებები

I ტურის დავალებათა სწორი პასუხები

ფრანჩესკო რედი (სიცოცხლის წარმოშობის შესახებ თვითჩასახვის ჰიპოთეზა მცდარია)

ფრანჩესკო რედი

იტალიელი ექიმი ფრანჩესკო რედი იყო პირველი ადამიანი, რომელმაც 1688 წელს ექსპერიმენტულად დაამტკიცა სიცოცხლის თვითჩასახვის (სპონტანურად ჩასახვის) ჰიპოთეზის მცდარობა. თავის ექსპერიმენტებში რედი ხორცის ნაჭრებს ათავსებდა ქილებში, რომელთაგან ზოგიერთს ტოვებდა თავღია, ზოგს კი აფარებდა მარლას ან პერგამენტს. გარკვეული დროის შემდეგ ხორცის ნაჭრები ყველა ქილაში იწყებდა ლპობას, მაგრამ მატლები ჩნდებოდა მხოლოდ თავღია ქილებში. ამით მეცნიერმა გააკეთა დასკვნა: ბუზების მატლები ლპობად ხორცზე ჩნდება არა თავისთავად (სპონტანურად), არამედ ხორცზე ბუზების მიერ კვერცხების დაყრის შედეგად და ცოცხალი მხოლოდ ცოცხალისაგან წარმოიშვება.

ფ. რედის ექსპერიმენტი - თავდახურულ ქილებში ლპობად ხორცის ნაჭრებზე მატლები არ გაჩნდა, ხოლო თავღია ქილაში გაჩნდა.

ბიოლოგიის კლუბში განხორციელებული აქტივობები (2023-2024)

 პოსტში თავმოყრილია ბიოლოგიის კლუბის წევრების მიერ 2023-2024 სასწავლო წელს განხორციელებული აქტივობების ჩამონათვალი:

კლუბის აქტივობები

სასარგებლო ოთახის მცენარეების ფოტოგამოფენა

 

ოთახის მცენარეების პოპულარიზაციის მიზნით ბიოლოგიის კლუბის წევრებმა სასკოლო სივრცეში მოაწყვეს ზოგიერთი გამორჩეულად სასარგებლო ოთახის მცენარის ფოტოგამოფენა.

დეტალური ინფორმაცია მცენარეთა შესახებ შეგიძლიათ იხილოთ დანართში:

სასარგებლო ოთახის მცენარეები

პოსტერი - რატომ უნდა მოვუაროთ ოთახის მცენარეებს?

 

კლუბის წევრებმა სკოლის ყველა სართულზე განათავსეს პოსტერი, რომლის მიზანიც იყო საზოგადოების ინფორმირება იმის შესახებ, თუ რატომ უნდა მოვუაროთ ოთახის მცენარეებს. 

რატომ უნდა მოვუაროთ ოთახის მცენარეებს?

ჩვენს სკოლაში აქტიურად მიმდინარეობს ოთახის მცენარეებით შენობის გამწვანების კამპანია, თუმცა, ალბათ, ბევრმა მოსწავლემ (და ზრდასრულმა) არ იცის, თუ რა სარგებლის მოტანა შეუძლიათ ოთახის მცენარეებს გარდა სილამაზისა და გარემოს ჟანგბადით გამდიდრებისა.

ბიოლოგიის კლუბი „გენეტიკური კოდი“ აქტიურად ჩაერთო ზემოაღნიშნულ კამპანიაში და სასკოლო საზოგადოების ინფორმირების მიზნით კლუბის წევრებმა დაამზადეს ფერადი პოსტერი - „რატომ უნდა მოვუაროთ ოთახის მცენარეებს?“, რომლებიც განვათავსეთ სკოლის ყველა სართულზე.

და მაინც, რა სარგებლობის მოტანა შეუძლიათ ოთახის მცენარეებს ჩვენთვის?

1. ამდიდრებენ გარემოს ჟანგბადით.

2. ამცირებენ ჰაერში მტვრისა და ნახშირორჟანგის რაოდენობას.

3. ატენიანებენ ჰაერს (რაც განსაკუთრებით მნიშვნელოვანია ზამთრის სეზონზე, როდესაც გამათბობლებია ჩართული).

4. ასუფთავებენ ჰაერს ბაქტერიებისაგან და სოკოს სპორებისაგან.

5. შთანთქავენ ელექტრომოწყობილობების მიერ გამოყოფილ გამოსხივებას.

6. ამცირებენ ოთახში ხმაურს და აუმჯობესებენ აკუსტიკას.

7. ასუფთავებენ ჰაერს ავეჯიდან და სამშენებლო მასალებიდან გამოყოფილი მომწამვლელი ნივთიერებებისგან.

8. გვეხმარებიან ძილის, მეხსიერების, განწყობილების გაუმჯობესებაში.

9. მათი მოვლით ბავშვები სწავლობენ ბუნებაზე ზრუნვას.

ბიოლოგიის კლუბი - „გენეტიკური კოდი“

2023-2024 სასწავლო წლის თებერვალში სსიპ - ქ. თბილისის №156 საჯარო სკოლაში ჩამოვაყალიბეთ ბიოლოგიის კლუბი, სახელწოდებით - „გენეტიკური კოდი“.

„ჩემი ზღაპრული ქვეყნის რუკა“ - მე-4 კლასი

     „ჩემი ზღაპრული ქვეყნის რუკა“ - ასე დავარქვით აქტივობას, რომლის მიზანი იყო, მე-4 კლასის მოსწავლეები გაცნობოდნენ რუკისა და რუკის ლეგენდის (მასზე დატანილი პირობითი ნიშნები) რაობას და გაეაზრებინათ მათი მნიშვნელობა მოგზაურისა თუ სხვა დაინტერესებული პირისთვის. ბავშვები შემოქმედებითად მიუდგნენ დავალების შესრულებას და კლასში წარადგინეს მრავალფეროვანი ნამუშევრები. თავიანთი ზღაპრული ქვეყნებისათვის ბავშვებმა შეარჩიეს უჩვეულო ფორმები (გული, პირამიდა, ვარსკვლავი და სხვ.), მოიფიქრეს ძალიან სახალისო სახელწოდებები ქალაქებისთვის და რა თქმა უნდა, შეეცადნენ რუკის ლეგენდის საშუალებით ადვილად გასაგები გაეხადათ თავიანთი რუკები. 

მიკროორგანიზმთა მოდელები (მე-7 კლასი)

     „ვქმნი საკუთარი ხელით“ - ნიშნავს უკეთ ვიაზრებ, ვსწავლობ და მამახსოვრდება. მე-7 კლასებში თემის „მიკროორგანიზმები“ გავლის შემდეგ მოსწავლეებმა კომპლექსური დავალების ფარგლებში  დაამზადეს მიკროორგანიზმების მოდელები. მასალად გამოიყენეს პლასტილინი, თიხა, ძაფი, ქაღალდი, მავთული, ზოგიერთი საყოფაცხოვრებო ნარჩენი და საკვები პროდუქტიც კი. მოსწავლეებს თავად შეეძლოთ აერჩიათ სამოდელო მიკროორგანიზმი. უმეტესობამ არჩევანი ბაქტერიებსა და ვირუსებზე შეაჩერა, თუმცა ასევე წარმოდგენილ იქნა წყალმცენარეები (ქლორელა, ლამიდომონადა) და უმარტივესები (მწვანე ევგლენა, ამება, ქალამანა).