ნებისმიერი სასწავლო აქტივობის განხორციელების დასასრულს, ალბათ, დამეთანხმებით, რომ განსაკუთრებული მნიშვნელობა აქვს მონაწილეთა მხრიდან უკუკავშირის მიღებას.
მეც მოვუმზადე მცირე კითხვარი ბიოლოგიის სასკოლო ოლიმპიადაში მონაწილე მოსწავლეებს, რათა მათი მხრიდან მიღებული შენიშვნების საფუძველზე უკეთ დავგეგმო მსგავსი აქტივობა მომავალ წელს.
ქვემოთ გთავაზობთ ჩემ მიერ მომზადებული კითხვარის Pdf ვერსიას და ასევე, მასთან დაკავშირებულ რამდენიმე რჩევას:
- ეცადეთ, კითხვარი არ იყოს ძალიან დიდი და დამღლელი, რათა მოსწავლეებს არ დაეკარგოთ შევსების სურვილი.
- მიეცით მეტი დახურული კითხვა სავარაუდო პასუხებით, თუმცა სასურველია ისეთი კითხვებიც, რაც მოსწავლეებს საშუალებას მისცემს, თავისუფლად გამოხატონ საკუთარი აზრიც.
- კითხვარი შეადგინეთ ონლაინ რეჟიმში, მაგალითად, მე მოვამზადე Google Forms-ში, მონაწილეებს Facebook-ში მოვუყარე თავი საერთო ჩატში, სადაც მარტივად გავუზიარე კითხვარის ბმული.
- ძალიან მნიშვნელოვანია მონაწილეთა მხრიდან ნდობა და მათი დარწმუნება კითხვარის ანონიმურობაში, რათა პასუხები იყოს გულწრფელი (ონლაინ კითხვარს ამ თვალსაზრისითაც აქვს უპირატესობა, რადგან მოსწავლემ იცის, რომ მის პასუხებს ვერ ამოიცნობენ, მაგალითად, გამორჩეული კალიგრაფიით).
ჩვენს ოლიმპიადაში 26 მოსწავლე მონაწილეობდა და მათგან 25-მა შეავსო კითხვარი. პასუხებიდან, გულწრფელად რომ გითხრათ, ბევრი მოსალოდნელი იყო, თუმცა მოულოდნელი პასუხებიც მივიღე :). მთლიანობაში, მიღებული ინფორმაცია ძალიან საინტერესო გამოდგა და ვისურვებდი, მონაწილეებს კიდევ უფრო ვრცლად გაეზიარებინათ თავიანთი შთაბეჭდილებები.
