 |
| გრაფიკული მაორგანიზებლები აადვილებს ინფორმაციის დაჯგუფებას და დამახსოვრებას |
სკოლასა და უნივერსიტეტში სწავლის პერიოდში უამრავი ტექსტის წაკითხვა და დასწავლა მიწევდა, რომლებიც ფურცლის მთელ სიგრძე-სიგანეზე ერთფეროვნად ჩალაგებული სტრიქონებისგან შედგებოდა. მახსოვს, როგორ მიხაროდა თუ ტექსტი მრავალ პატარ-პატარა აბზაცად იყო დაყოფილი - ასე, თითქოს, უფრო ადვილი იყო შინაარსის გაგება და რაც მთავარია, წაკითხულის დამახსოვრება.
ერთ დღესაც დამოუკიდებლად „აღმოვაჩინე“, რომ ტექსტში გაბნეულ ინფორმაციას ძალიან მარტივად შეიძლება მოვუყარო თავი ე.წ. გრაფიკული მაორგანიზებლების დახმარებით და მას შემდეგ, ეს სქემატური გამოსახულებები ინფორმაციის შეკრების, დახარისხებისა და გამოსახვის საყვარელ ინსტრუმენტად მექცა. ძალიან გაოცებული დავრჩი, როცა მოგვიანებით, ინტერნეტის საძიებო სისტემებით ვიპოვე სქემატური გამოსახულებების უამრავი ნაირსახეობა. გაოცებას თან ახლდა წყენის განცდაც, ერთი მხრივ იმის გამო, რომ სქემები, რომლებიც თავად მოვიფიქრე, არ აღმოჩნდა უნიკალური და განუმეორებელი, რადგან სხვებსაც ჰქონიათ შექმნილი, მეორე მხრივ კი იმის გამო, რომ თურმე არსებობდა სქემატური გამოსახულებების უზარმაზარი მრავალფეროვანი სისტემა, რომელიც თავის დროზე არავინ გაგვაცნო და მე და ჩემს მეგობრებს საათობით გვიწევდა ურთულესი სამეცნიერო ტექსტების დამუშავება, რათა გამოცდაზე უმაღლესი შეფასება მიგვეღო (აღარაფერს ვამბობ ცოდნის მიღებაზე)...
ვერ ვიტყვი, რომ სქემატური გამოსახულებები ყველა მოსწავლეს ერთნაირად მოსწონს. მართალია, აღქმის პროცესი უადვილდებათ, მაგრად დამახსოვრებისთვის ბავშვების ნაწილი (განსაკუთრებით უმცროსი ასაკის - V-VI კლასი) ისევ სახელმძღვანელოს ტრადიციულ ტექსტს მისდევს. ასაკის მატებასთან ერთად იზრდება მათი რიცხვიც, ვინც აქტიურად იყენებს გრაფიკულ მაორგანიზებელს როგორც დამახსოვრებისთვის, ისე ანალიზისთვის. უფრო მეტიც, ზოგიერთი მოსწავლე მეკითხება, შეიძლება თუ არა შემაჯამებელი წერის დროს სქემატურადვე გასცეს პასუხი ღია შეკითხვას. რატომაც არა? თუ მის მიერ გამოყენებული სქემა შეკითხვას სწორად პასუხობს და მოსწავლეს უადვილებს საკუთარი აზრის გადმოცემას.
No comments :
Post a Comment